RTVS одвысылать діскузії з лідрами вшыткых політічных субєктів кандідуючіх в парламентных вольбах. Од понедїлька 10. фебруара зачінать зо штруктурованыма діалоґами. Інформовала о тім говоркыня RTVS Еріка Руснакова. ,,Діскузії мають уможнити лідрам політічных субєктів, жебы представили волічам свої одношіня і представы повязаны з выконом функції посланця Народной рады СР і ёго компетенцій при овпливнёваню домашнёй і загранічной політікы,“ підчеркнув шеф справодайства RTVS Ваграм Хуґуріан. Каждый день ся представлять троє лідры, послїднїй день штирьме. ,,RTVS їх одвысылать на Єднічкі од 10. до 19 фебруара (мімо вікендів) о 16.25 г а в Радію Словеньсько о 20.05 г,“ приближыла Руснакова.

                                                                                                          (Шутіова, TASR)