Проєкт залучіня безробітных до обновы културной дідовизны зістане захованый а буде продовжовати і в роках 2024 – 2025. З Европского соціалного фонду є на то алокованых 12,5 міліона евр. На понедільковій пресконференції о тім інформовали шефове Міністерства културы і Міністерства роботы, соціалных справ і родины Мартіна Шімковічова і Ерік Томаш. Міністерка підкреслила, же тот проєкт є прикладом розумной співпраці меджі веце інштітуціями публічной справы. В новій фазі мають ренововати приблизно 30 памяток, выберати їх має міністерство. Проєкт залучіня безробітных до обновы културной дідовизны фунґує на Словакії од 2011-го року, в першых роках комбіновав дотачны средства резортів културы і роботы.

(Медвідь, TASR)