Вшыткы сьме на єдній шыфі, віруючі і невіруючі. По стрічі зо заступцями церькві то днесь повів председа влады Іґор Матовіч. Єдночасно вірить, же зо сітуаційов собі порадиме. Премєр позначів, же Словакія про сітуацію у звязку з епідемійов нового коронавірусу прожывать трапіня. Подля Матовіча буде тогорічный Великдень іншым. Подякував церьквам за їх приступ і дотримуваня пріоріты, котров є хранити людьскый жывот. Председа Конференції єпіскопів Словеньска і братіславскый арцієпіскоп метрополіта Станіслав Зволенскі підчеркнув, же іде о першу офіціалну стрічу з новов владов. Повів тыж, же католицька церьква решпектує погляд влады, котра вырішыла запровадити строгы крокы у звязку з епідемійов нового коронавірусу. Єдным з них є крок, же ся неможуть одбывати публічны службы божы. Представителі церькві з премєром рішыли і вопрос, коли бы ся могли знову отворити храмы і зачати в них публічно служыти божы службы. Премєр на то одповів, же днесь іщі не є можне становити тот термін.  (TASR, Pkf)