Особам у карантені Словацька пошта не буде доручовати, автоматічно о вшыткім загнанім зохабить у поштовій скринці оголошіня о уложіню, значіть жовтый листок. Інформовала о тім говоркыня Словацькой пошты Ева Ровеньска. Заказників, котры суть в карантені, пошта жадать, жебы на своїй поштовій скринці або на бринчку чітательно тот факт оголосили і звернули на то увагу поштаря. О можливостях довшого терміну на выбратя пошты і уплатніню безконтактного доручованя в повязаню з тым комунікує пошта з Урядом про реґулацію електронічных комунікацій і поштовых служеб Словацькой републікы. Пошта рекомендує не навщівльовати свої філії і покля є то можливе выбавити собі потребы онлайн, через мобілну аплікацію або почекати на успокоїня сітуації.

(Медвідь, TASR)