Словацькы росплоджователі бандурок потребують фінанції на будованя завлаг і складовых капаціт. В припаді ліпшой і флехібілнішой підпоры з боку штату бы за їх словами доказали забезпечіти цілкову самостатність Словакії в конзумації бандурок.  За словами председы Словеньской землегосподарьской і потравинарьской коморы Еміла Махы понижыла ся зберова територія бандурок на Словакії на 7500 гектарів, на котрых ся днесь выпродукує нецілых 150.000 тон бандурок річно. Як далі повів Маха, „потребуєме векшу підпору. В ній довгодобо заоставаме за країнами  V4 і за европсков серединов. До будучности ся на европскім отворенім лібералізуванім торгу потребуєме приспособити тренду підпор і дотацій. Як нам будуть вытворены условія, так на Словакії знаме мати без проблемів 12.000 гектарів бандурок і будеме  мати стоперцентну самостатність.“ (TASR, Pkf)