Словакія бы в области того, жебы передыйти насилству на женах, мала продовжовати в сістемовых рішінях. Важнов є так само робота з публічным мніньом. По стрічі з представителями мімовладных орґанізацій, котры занимають ся тов областьов то повіла в понедільок в Презідентьскім палаці презідентка Словацькой републікы Зузана Чапутова. „Суть то темы, котры суть вынятково важны і в контексті бруталного убийства, котре одбыло ся минувшый тыждень в Братіславі. Є барз важным такым темам і діям передыйти і шыроко діскутовати в сполочности, жебы подобны справы ся не діяли і еліміновали,“ повіла презідентка. Подля Чапутовой країна потребує продовжовати в сістемовых рішінях окремых інштітуцій, і жебы то было предметом меджірезортного думаня і рішінь. Звернула увагу, же третина Словаків думать, же насилство на женах є припустне.

(Медвідь, TASR)