Папа Франціск одказав Словакії, жебы в повязаню з коронакрізов бойовала і вытримала. Повіла то презідентка Зузана Чапутова по приятю Папом у Ватікані. Презідентка запросила Понтіфекса на навщіву Словакії. Франціск запрошіня прияв, но увидить, як то доволить сітуація у світі. Інтерес прийти є подля Чапутовой щірый. Презідентка у Ватікані їднала і зо секретарьом про односины із державами Паулом Ріхардом Ґаллаґером. Стрітила ся і зо словацькым кардіналом Йозефом Томком. Голова державы положыла квіткы і ку гробу св. Кіріла в Базиліці св. Клімента. Чапутова принесла до Ватікану 10 тісяч PCR тестів на коронавірус. Ватікан їх схоснує про людей без домова і в шпыталях, де ся о такых людей старають. Біохемік Павел Чекан, котрый быв у делеґації презіденткы, і котрого фірма тесты подаровала, повів, же Папа быв тестам барз радый.

(Медвідь, TASR)