Представителі народностных меншын суть інтеґралнов частьов будованя новодобой історії Словакії, розвиваня демокрації і інтеґрачных намагань в европскых штруктурах. Заслужыли бы собі зато векшый політічный інтерес і леґіслатівну опору їх намагань заховати і розвивати свою културу і ідентіту, повіла у віторок презідентка Словакії Зузана Чапутова почас приятя представителів народностных меншын в Презідентьскім палаці. Стрічу з меншынами презідентка скликала з нагоды 30-ой річніці выникнутя Словацькой републікы. За русиньску меншыну были участны членове Выбору про народностны меншыны і етнічны ґрупы Петро Медвідь і Мілан Ян Піліп, як і їх заступници у выборі Мартін Караш а Петро Штефаняк. Русиньска делеґація подаровала презідентці книжку русиньского історіка Івана Попа з назвов Мала історія Русинів.

(Медвідь)