Справа Татраньского народного парку запожычала дві десяткы препаратів звірят Споєній школї інтернатній в Левочі. Навщівляють ю слабозракы і невідячі дїти а тыж школярї з іншым здравотным зневыгоднїнём. Директорка школы Луція Залчікова увела, же препараты хоснують на годинах природопису і біолоґії, але і наприклад на словенчінї. ,,Дакілько експонатів уж у нас маме, але суть опотребованы, также тота нова збірка нам доісна поможе не лем на розвиток змыслового вниманя, але і на зажыткове навчаня, Дїти, котры мають ослабеный зрак або їм цалком хыбує, пoтребують запоїти компензачны змыслы. Найідеалнїше є, кедь їм дїла, з котрыма приходять до контакту, або ся їх намагаме представити, даме в реалній подобі, а то платить і о звірятах. Є то ідеалне, жебы спознали великость звірятя, штруктуру єго серсти, скоры, шупін і подобно,“ высвітлила Залчікова. Повіреный директор Справы ТАНАП-у Михал Бабніч додав, же іде о препараты, котры были дотеперь в депозітарёх а не сповняють условія на выставованя. Дїти штудуючі в Левочі достали препараты як дарунок на Николая а хосновати їх будуть мочі як навчалный матеріал найблизшых пять років.

(TASR, Шутіова)