Заочкованы і люди, котры переконали захворіня COVID-19, будуть мати можность в чорных окресох ходити до рештаврацій ці до готелів і пензіонів. Згодла ся на тім коалічна рада, ознамив то Едуард Геґер на соціалній сіті. Кабінет бы мав на найближшім їднаню голосувати о многых опатрінях. Єдным з них є, же Уряд верейного здравотницьтва і поліція будуть мати новы компетенції, і на місці дати покуту або заперти подник. Як особа уразить здравотників або сфалшує COVID pass, так ся звышить блокова покута на 1000 евр. Влада бы мала тыж вырішыти і о тім, же заместнавателі будуть мати можность жадати од робітників COVID pass. Повинне очкованя про выбраны ґрупы ся затля апліковати небуде. (TASR, Pkf)