Міністерство школства, баданя, розвитку і молодежі (МШБРіМ) СР підписало меморанда о кооперації з трёма умелецькыма высокыма школами  – Высоков школов музічных умень в Братїславі, Высоков школов вытварных умень в Братїславі і Академіёв умень в Баньскій Быстрїцї. Їх цїлём є підпорити талент молодых умелцїв і сприступнити їх творбу верейности. ,,Талент молодых людей і їх педаґоґів сі заслужыть не лем узнаня, але і простор, де можуть рости а іншпіровати. Хочеме верейности указати, якы вынятковы особности выростають на словацькых умелецькых высокых школах,“ повів міністер школства Томаш Друкер (Hlas-SD) по підписі меморанд. Меморанда мають подля МШБРіМ підпорити інтелектуалну і културну выміну меджі академічным середовищом і верейным простором, спростредковати умелецьку дїялность штудентів і педаґоґів верейности а тыж уможнити выставованя умелецькых дїл в просторах міністерства. Зарівно ся рахує з презентаціёв музічных, театралных ці танечных выступлїнь штудентів і педаґоґів протягом подїй резорту.

(TASR, Шутіова)