В юні минувшого року Фолклорный ансамбель Рутенія, котрый діє в столиці Словакії – Братіславі, одпремєровав своє найновіше танечно-драматічне представліня, яке дістало назву іншпіровану книжков Павла Роберта Маґочія – Хырбетом ку горам. Творці представліня ся заміряли на першу половину 20-го столітя, котра была про Русинів фундаментална – выселенецьтво за океан, Перша світова война, політічна і народна еманціпація, приєднаня до складу Чехословакії, несповнена автономія, але і Друга світова война, анексія Підкарпатьской Руси Совітьскым союзом, вычеркнутя Русинів з мапы світа, третє народне возроджіня. Рутенія втогды премєров одсвятковала, з дворічным опізніньом з причіны пандемії, свій десятый юбілей існованя. Теперь ансамбель рихтує ся на турне, в рамках котрого тоту інсенацію одограть в штирьох містах на выході Словакії. Представліня Хырбетом ку горам буде мож видіти в місяці новембер в Снині і Пряшові, а в місяці децембер у Свіднику і Старій Любовні. Листкы на окремы выступліня мож купити онлайн. Веце інформацій на плаґаті і сайті ансамблю. (ЛЕМ.ФМ, Пкф)