Рух Sme rodina знова пропонує запроваджіня фінанчной помочі ку родинным придавкам у вышці 25 евр. Выплачали бы ся все в септембрі і мали бы холем часточно рефундовати векшы вытраты родин на зачатку школьского року. Подля депутаткы руху Петры Кріштуфковой є септембер фінанчно найскладнішым місяцьом про родины із дітми. В понедільок о тім інформовала на пресконферецнії. Сума вытрат родин із дітми на основных і середніх школах є подля депутаткы аж до вышкы 450 евр. „Нажаль, ани влада, ани міністры тото не рефлектують. Мамєме міністра, котрый тот резорт рядить вже довго. Но темов сістемовой підпоры родин ся нияк не занимав. А ниґда ани не запропоновав уцілену концепцію сістематічного рішіня родинной політікы. Зато знова по році приходжу з тов самов пропозіційов і тым самым пересвідчіньом о тім, же треба родинам в тім періоді помочі. Хочеме запровадити поміч, котра в нас нияк не існує, а притім є нормалным штандардом в іншых державах,“ повіла депутатка в понедільок. Кріштуфкова арґументовала, же наприклад в Австрії фунґує дашто подобне довгы рокы. Покля їй пропозіція не перейде, вірить, же ся тым холем будуть владны депутаты іншпіровати.
(Медвідь, TASR)