Мімопарламентна партія Spolu, котру веде незарадженый депутат Мірослав Беблавый підпорить в презідентьскых выборах кандідата Роберта Містріка. На пресконференції о тім в понедільок інформовав шеф політічного субєкту. Подля його слов о підпору окрім Містріка жадала і підпредседничка партії Progresívne Slovensko Зузана Чапутова. „Партія Spolu – občianska demokracia дішла до заключіня, же найліпше, што можеме про Словакію зробити, є підпорити кандідата, о котрім собі думаме, же має єднакы вартости як мы, і о котрім собі єдночасно думаме, же має реалны шансі тоты выборы выграти. Такым кандідатом є про нас Роберт Містрік і по тім, што го выслухала презідія Spolu, сьме в тайнім голосованю єдноголосно вырішыли о його підпорі, о тім, же буде і нашым кандідатом на презідента Словацькой републікы,“ повів Беблавый. Роберт Містрік є бывшым членом лібералной SaS, котру і співосновав. Свою кандідатуру высокошкольскый педаґоґ оголосив на соціалній сіті як непартійный.
(Медвідь, TASR)