x

Словакія має меншынову владу

00

Вчерашньов демісійов далшых трьох міністрів за SaS лібералы дефінітівно одышли до опозіції. Їх пожадавка, жебы Іґор Матовіч одышов із функції міністра фінанцій не была наповнена і так Марія Коликова, Іван Корчок і Браніслав Ґрылінґ вчера доручіли свої абдікації по тім, што минувшый тыждень абдіковав їх председа Ріхард Сулик. Премєр Едуард Геґер оголосив, же решта коаліції, котру творить уж лем OĽaNО, Sme rodina і Za ľudí, іде до меншыновой влады, котра буде мати підпору 70-ох депутатів. SaS притім акцентує, же не розбила владу, не роздумує над передчасныма вольбами, і буде голосовати в парламенті за законы, котры будуть в згоді з Проґрамовым выголошіньом влады. Подля OĽaNО будуть на посады вольных міністерьскых кресел номінованы непартійны фаховці. Презідентка Зузана Чапутова декларовала, же все буде думати над пропонованыма кандідатами на новых міністрів, но не видить причіну продовжовати актуалну аґонію в повязаню з владнов крізов. Од премєра очекує мена кандідатів і підкреслила, же влада потребує фунґовати, жебы конечно рішыла проблемы не себе, але країны.

(Медвідь, TASR)