x

Словакія накупить 2 міліоны російской вакціны

00

Словакія накупить два міліоны російской вакціны Спутник V. Премєр Іґор Матовіч о тім інформовав у понедільок з кошыцького аеропорту, де привезли першу додавку. Міністер здравотницьтва Марек Крайчі потвердив, же вакцінація російсков нереґістрованов вакцінов буде добровольна і без обмеджіня віку. Зачати бы ся могло найскоріше за два тыждні. Російска вакціна выкликала на політічнім спектрі різны реакції. Покля Smer-SD забезпечіня Спутника V вітать, коалічна партія SaS бы привітала, кебы была вакціна перед щіпліньом схвалена будь Европсков ліковов аґентуров або бы здобыла позітівну оцінку од Державного інштітуту про контролю ліків. Ку тому, же премєр вітав додавку російскых вакцін на аеропорті, крітічно выразив ся і міністер загранічных діл Іван Корчок. З коаліції на знак протесту проти додавкам нереґістрованых вакцін выступив далшый депутат – Томаш Валашек із партії Za ľudí. Якраз шефка той партії, Вероніка Ремішова, на засіданю влады была твердо проти накупованя нереґістрованой вакціны.

(Медвідь, ТASR)