Премєр Іґор Матовіч бы мав пороздумовати о переданю менежнованя пандемії іншому членови влады. Повіла то в понедільок презідентка Зузана Чапутова в діскусній релації на радію Expres. За словами презіденткы бы пак мав премєр веце часу на перевзятя іншых справ. Функція премєра є подля Чапутовой комплексніша. Зміна на позіції „менежера пандемії“ ся їй натеперь видить як добре рішіня. Голова державы не роздумує о тім, же бы вызвала владу Іґора Матовіча на реконштрукцію владного кабінету. „Вірю і маю надію, же окрім рішіня пандемії видить цілый контекст сполоченьской сітуації і думать над вшыткыма можностями,“ повіла. Словакія за словами презіденткы потребує ясный план на звладнутя крізы, а не хаос. Чапутовій хыбить поступ кроків, котрый буде раціоналный, меріторічный і опертый о научны знаня. Влада подля ньой теперь не мусить „вынаходити колісо“.

(Медвідь, TASR)