Словацька презідентка Зузана Чапутова заблагожелала у четверь ку інавґурації новой чеськой головы штаты Петрови Павлови. Верейный одказ му написала посередництвом соціалной сїтї Твітер. На тій самій платформі Павлови ґратуловав і дочасно повіреный премєр СР Едуард Геґер, інформує о тім TASR. ,, Єм рада, же на чолї штату, котрый є Словакії найблизшый, є чоловік, з котрым маме єднакы годноты. Жычу Вам велё добрых рішїнь. Тїшу ся на сполупрацу а занедовго і на стрїчу в Братїславі,“ написала Чапутова. В згодї з традіціёв чеськых презіднетів Павел одбуде свою першу загранічну путь на Словакію, а то уж будучій понедїлёк 13. марца. З планованой Павловой пути на Словакію выразив потїшіня і Геґер. ,,Ґратулую презідентови Петрови Павлови ку днешнїй інавґурації. Важу сі, же і він буде продовжовати в традіції а ёго перша загранічна путь буде вести на Словакію,” увів Геґер.

(TASR, Шутіова)