Председа OĽaNO і будучій премєр Іґор Матовіч представив днесь зложіня свойой влады. Новый кабінет призначіть презідентка СР Зузана Чапутова в суботу 21-го марця. Голова штату тыж ознамила, же акцептує вшыткы пропонуваны мена. OĽaNO окрім премєрского місця про Матовіча здобуде сім міністерстев. Міністром фінанцій буде Едуард Геґер, міністром внутра Роман Мікулец, міністром здравотницьтва Марек Крайчі, міністер обраны Ярослав Надь, резорт польногосподарства буде вести Ян Мічовскый, міністерство жывотного оточіня Ян Будай і міністерков културы ся стане Наталія Міланова.  Рух Сьме родина здобыв три резорты. Міністром праці, соціалных справ і родины буде Мілан Крайняк, міністром транспорту і выставбы буде Андрей Долежал і підпредседом влады про леґіслатіву і стратеґічне планованя буде Штефан Голі. Три міністерства буде мати і партії SaS. Міністром школства буде Браніслав Ґролінґ, міністром заграничных справ і европскых односин буде Іван Корчок і міністром господарьства председа SaS Ріхард Сулік, котрый єдночасні буде і першым підпредседом влады про економіку. Партія За людей здобуде два резорты, міністерков справодливості буде Марія Колікова і підпредседничков влады про інвестиції ї реґіоналный розвой Вероніка Ремішова. (TASR, Pkf)