RTVS дістане од державы далшых 675 тісяч евр, майже половину схоснує на накупліня новых музичных інштрументів про Сімфонічный орхестер Словацького розгласу. Веджіня верейноправного телерозгласу о тім інформовало в понедільок. Інвестічну інъєкцію подля директора секції проґрамовых служеб розгласу Михала Дзуряніна собі выжадує потреба обновы части музичных інштрументів, на што не суть грошы. „Будеме годны купити інштрументы головно до дыховой секції, де ся ціна інштрументів рушать в десятках тісяч евр, часть сумы інвестуєме і до обновы орґану, самособов, не піде о комплексну реконштрукцію, котра є розділена на веце етап,“ уточнив Дзурянін. Далшы грошы мають у 2019-ім році іти на выробу проґрамів ку Року М. Р. Штефаніка, святкованю 75-ой річніці СНП, но о 250 тісяч піднимать ся і сума про народностне высыланя в розгласі і телевізії. Кедьже іде о єдноразове піднятя, подля Аттілы Ловаса, директора секції народностного высыланя RTVS, ся грошы схоснують на выробу радіовых і телевізных проґрамів, котры будуть належати ку золотому фонду, як наприклад портреты особностей ці літературно-драматічны творы.

(Медвідь, TASR)