Днесь собі припоминаме 80 років од закінчіня Другой світовой войны. Бої з тых часів доднесь припоминають наприклад памятникы і цінтері на Дуклі і у Свіднику. Суть на них похованы тісячі воків, і вєдно з далшыма обєктами в русиньскім реґіоні під Дукльов, де одбыли ся тяжкы бої, належать під Народну културну памятку Дукляньске поле битвы. Як про аґентуру TASR повів історік Воєньского історічного інштітуту Братіслава Петер Голик, першым збудованым быв Памятник 1-го Чехословацького армадного корпусу в СССР на Дуклі з войновым цінтерьом. Фундамент положыли 6-го октобра 1947-го року, о два рокы быв одкрытый. На самім цінтері є похованых 565 членів 1-го Чехословацького армадного корпусу в СССР, котры впали будь прямо почас Карпато-дукляньской операції або почас далшых боїв за ослободжіня.  За його словами суть там похованы Словаци, Чехы, Русины, а так само сім вояків Червеной армії, котры были приділены ку армадному корпусу ґенерала Свободы. Што до памятника у Свіднику, його фундамент быв положеный курто по тім, як быв одкрытый памятник на Дуклі. То значіть початком октобра 1949-го року з тым, же святочно одкрытый быв 3-го октобра 1954-го року. Памятник є векшый комплекс, котрый творять чотыри масовы гробы, де є цілково похованых 9000 членів Червеной армії, якы впали будь почас Карпато-дукляньской операції або в далшых боях за ослободжіня. Із вышткых 9 тісяч вояків мають дотеперь ідентіфікованых понад 500. (ЛЕМ.ФМ, Пкф)