Чабалівці суть маленькым приграничным село в котрім жыє 347 жытелів. Наперек тому, же є маленькым селом перейшли Чабалівці за послідні рокы великыма змінами. Завдякы схваленым проєктом з котрых здобыли фінанції з еврофондів і од штату могли окрім іншого зреконштруовати сельскы комунікації в довжкі 3,5 кілометра, зреконштруовати обще освітліня в селі, выбудовати пішникы в довжкі 1,2 км.  Старостков села є Гелена Зянова, котрой сьме ся опросили на планы, котры бы хотіла зреалізувати в тім року, „до будучності правдаже маме планы. Нехочеме, абы наше село заостало за іншыма. Уж днесь  можу повісти, же ідеме до реконштрукції  дому смутку на котрый сьме достали  фінанції з европского фонду.  Маме уж підписаный договор з Польногосподарьсков платобнов аґентуров  у вышкі 28.000 евр.“ Як далі старостка села Чабалівці Гелена Зянова повіла, дальшым важным інвестичным проєктом в тім року буде і реконштрукція  Културного центра в часті села Стерківці в сумі 15.000 евр. Окрім того старостка бы была рада кедь бы їм схвалили і проєкт на реконштрукцію културного дому, гасіцького будинку ці реконштрукцію мултіфункчного гріска. (Пкф)