Турістічный рух і підниманя навщівности атрактівных місць в краю, як і підпора молодых. То были темы недавного білатералного їднаня веджіня Пряшівского самосправного краю (ПСК) з чеськым послом на Словакії Рудолфом Їндраком. Нововыменованый чеськый посол навщівив у понедільок 19-го юна 2023-го року Уряд ПСК першый раз у своїй функції. Інформовало о тім Одділіня комунікації ПСК. Надзвычайного і повноважного посла Чеськой републікы (ЧР) в Словацькій републіці (СР) Рудолфа Їндрака гостив підпредседа ПСК Штефан Бєляк. Стріча была заміряна на проглубліня взаємных чехо-словацькых односин і розшыріня співпраці. Чеськый амбасадор недавно выразив і свої односины ку Русинам.  12-го юна того року першый раз одбыло ся святкованя Дня Русинів Словакії і в Братіславі. Святкованя, котры орґанізовав  председа Округлого стола Русинів Словакії Петро Штефаняк, одбыли ся  в Чеськім домі, і святочный приговор окрім председы Округлого стола Русинів Словакії, уповномоченого влады СР про народностны меншыны Ласла Буковского, мав і посол ЧР на Словакії Рудолф Їндрак. Тот на події повів, же Чеськый дім є ту і про Русинів, а споминав сполочну історію нашых народів, котра найвеце скапчала ся в рамках 1-ой Чехословацькой републікы. (ЛЕМ.ФМ, ПКФ)