Влак Беляньскый експрес зачав в суботу 27-го децембра  свою сезону і буде кажду суботу і неділю спойовати Попрад з польсков Мушинов аж до 22-го фебруара 2026-го року. Як пресаґентуру TASR інформовала говоркыня Пряшівского самосправного края Даша Єленьова, Беляньскый експрес за послідні рокы здобыв приязень словацькых і польскых турістів. „Понукать не лем комфортны і еколоґічны формы транспорту, але і можность обявити атрактівны міста на обідвох боках границі без стресу з паркованя ці довгого шоферованя,“ сконштатовала Єленьова. Влак є подля ньой ідеалный на єднодньовы вілеты і вікендовы перебываня. Жытелі Словакії можуть  выбрати ся за польскыми кипелями, ґастрономійов ці зимнов атмосферов Мушины, польскы навщівници знову за красами підтатраньского реґіону. Путуючій гармоноґрам є приправленый так, жебы уможнив і навернутя в тот самый день. Джерело фотоґрафії: ПСК (ПСК, Пкф)