21-го децембра Ґрекокатолицькый храм блаженого священомученика Василя Гопка навщівив пряшівскый архієпіскоп і митрополіта Высокопреосвященый Йона Максим. Перед торжественнов літурґійов владыку привітав староста села Юрій Петрик і адміністратор парохії Яков Ясик. Наслідовало посвячіня іконостасу, кивота і євангеліяря. Почас проповіді в русиньскім языку кір Йона звернув увагу на родостром Ісуса Хріста, кедьже была Неділя святых отців. На кінцю торжества адміністратор парохії подяковав Господу Богу і вшыткым віруючім, котры помогли з рихтованьом того свята. Вдяка належала і священикам, котры на парохії служыли, і в непосліднім шорі владыкови Йонови, котрого присутность была знаменом єдности Церькви і отцьовской опікы.

(Медвідь, ISPA)