Братіславскый єпарха і апостольскый аміністратор Пряшівской ґрекокатолицькой архієпархії владыка Петро Руснак навщівив 7-го юла православного михалівско-кошыцького архієпіскопа владыку Ґеорґія Страньского. Їх стріча почала в православнім кошыцькім катедралнім соборі і продовжовала в пасторачнім центрі. Владыкове поділили ся о свої скушености у вірі а бісідовали і о сітуації в повязаню з войнов на Україні, ці о хвороті ковід і душпастырьстві в контексті тых обставин. Як обидвоми конштатовали, такы особны неформалны стрічі суть єднов із найліпшых путей до взаємного порозуміня, гляданя можливостей співпраці і до передаваня свідоцтва віры.

(Медвідь, ISPA)