Вігорлатьскый музей в Гуменнім закінчів ку 30-му септембру 2022-го року літню музейну сезону. Наперек непрязным дослідкам протипандемічных наряджінь в попередніх роках, інштітуція може похвалити ся в рамках тогорічной літньой сезоны рекорднов навщівностьов. Помострити собі його експозіції пришло 27 412 людей із Словакії і заграніча. В порівнаню з єднакым періодом минувшого року тото чісло наросло о майже 14 і пів тісяч навщівників. Із загранічных найвекшу ґрупу творили навщівници з Чеськой републікы, Польщі, Мадярька, але были і навщівници споза моря. Тогорічна кількость навщівників за літній період є докінця высша як навщівность музея за цілый попереденій рік. Основнов музейнов понуков і тот рік од мая до септембра были експозічны просторы, конкретно умелецько-історічна, сакрална, природонаучна експозіція в каштелю, і експозіція народной архітектуры і бываня (сканзен, де суть і памяткы з русиньскых сел реґіону), котры почас літя навщівило майже 18 600 навщівників. Найвыглядаванішов была знова умелецько-історічна експозіція в каштелю, збогачена о множество цінных новых збірковых аквізіцій. Експозіція притягла майже 8000 навщівників. (LEM.FM, Пкф)