У четверь на намістю в Гуменнім споїли школярї высше 8000 выфукнутых яїчок до ланца з цїлём вытворити словеньскый рекорд в найдовгшім ланцї з яїчок. Як про TASR увела майстерка утримованя верейной зеленї Франтїшка Мудра, ланц, котрый переходив намістём, мав довжку 444,4 метра. До подїї ся запоїло 14 основных і матерьскых школ, переважно з Гуменного, а дві матерьскы школы сел в окресї. ,,Хотїли сьме дїтём указати традічны можности, як сі выфукати яїчко а як сі го оздобити еколоґічно, жебы сьме не куповали збыточнї пластовы а вывжыли то, што маме дома а што хоснуєме,“ высвітлила Мудра. Вшыткы выфукнуты яїчка будуть поужыты на тогорічну великодню выздобу міста. ,,Намагаме ся, жебы наша выздоба была довгодобо реціклована, ці уж великодня, або рождественна,“ закончіла Мудра.

(TASR, Шутіова)