Од 16-го до  23-го юна 2023-го року проходив в Кошыцях вже 29-ый річник меджінародного філмового фестівалу Art Film Fest. Почас вісем фестіваловых днів мала публіка можливость видіти 146 філмовых продукцій із штирьох контінентів світа. Якраз на Art Film Fest было мож видіти і цілосвітову премєру нового ціловечурнього документарного філму з назвов Енді Варгол – америцькый сон (оріґ. Andy Warhol – americký sen), котрого режісером є Ян Любомір Сливка і сценарістков Петра Бабіч Сливкова. Копродукчным партнером нового філму є Музей модерного уменя Енді Варгола в Меджілабірцях. Філм на фестівал пришов представити єден із протаґоністів, сын брата Енді Варгола, вызначный книжковый ілустратор Джеймс Варгола, котрый пришов із Споєных штатів Америкы із свойов женов. (ЛЕМ.ФМ, ПКФ)