x

В Меджілабірцях буде через вікенд Цілонародне свято – День Русинів

00

Датум 12-ый юн быв Світовым конґресом Русинів выголошеный за Цілонародне свято – День Русинів на Словакії. Є то памятка на масовы Дні русиньской културы за 1-ой Чехословакії і одкрытя памятника Александрови Духновічови в Пряшові в 1933-ім році. Од 50-ых до 90-ых років 20-го столітя настала силена павза в розвитку русиньского руху на Словакії. Аж по револучнім 1989-ім році настало возроджіня Русинів. Поступно выникали русиньскы орґанізації, котры ся доднесь намагають сохраняти културну дідовизну Русинів. Першов з них была Русиньска оброда на Словеньску, котра ся зродила в Меджілабірцях. І якраз з той нагоды Русиньска оброда на Словеньску в сполупраці з містом Меджілабірці, котре є в рамках проєкту Головным містом Русинів, орґанізує од днесь до неділі Цілонародне свято – День Русинів. Днесь проґрам зачав положіньом квітя на гріб Адолфа Добряньского в Чертіжнім. Завтра буде проґрам продовжовати пообідньов стрічов участників перед Містьскым урядом в Меджілабірцях, одкы піде процесія містом ку дому културы, на котрім є памятна табла І. Світового конґресу Русинів. По приговорах русиньскых і штатных представителів буде проґрам продовжовати в кіносалі, де выступлять діти і школярі, фолклорны колектівы зо Збійного, Свідника, Старолюбовняньского окресу і Снины. В неділю ся одбудуть святочны літурґії в меджілабірьскых церьквах.