Посланці Пряшівского самосправного края (ПСК) ся днесь стрітли на девятім засіданю крайского парламенту. На проґрамі мають 17 пунктів, меджі нима є наприклад  пропозиція на Ціну ПСК ці цільова дотація у вышці 100.000 евр про обывателів засягнутых землетрясїньом. Пресаґентуру TASR о тім інформувала Леа Леготска з одділіня комунікації і пропаґації Уряду ПСК. На ціну ПСК за рік 2023 суть номінованы емерітна деканка Факулты здравотницькых одборів Пряшівской універзіты в Пряшові Анна Еліашова, Фолклорный колектів Врановчан і музикантка Любіца Чековска. ПСК тыж ся буде заоберати вытворіньом розрахунковой орґанізації ПСК, котра буде мати назву Центрум підпоры ПСК, котрой цільом буде выбраным орґанізаціям края реалізувати орґанізачны, економічны ці адміністратівны роботы. (TASR, Pkf)