Як інформовало Одділіня комунікації Пряшівского самосправного краю (ПСК), крайска самосправа вєдно з Крайсков бібліотеков Павла Орсаґа Гвієздослава і реґіоналныма бібліотеками в Попраді, Левочі, Воронові над Топльов, Гуменнім, Свіднику, Бардейові і Старій Любовні выголосили 7-ый рочник чітательского конкурзу Книга рока ПСК. Книгы, котры мож приголосити до конкурзу, мусять як звычайно мати повязаня з реґіонами ПСК, і то темов або особов автора текстовой ці образовой части. Чітателі з Пряшівского краю, але і зоставователі, редакторы, выдавателі, книгкупці, дістрібуторы книжок ці бібліотекы а авторы можуть тіпы на тоту нагороду передкладати в пятьох катеґоріях. Конкретно іде о катеґорії Белетрія про діти і молодеж, Белетрія про дорослых, Научна література і Популарно-научна література. Послідньов катеґорійов, до котрой мож книжкы приголосити, є Україньска і русиньска література. Номіновати мож книгы, котры были выданы в роках 2022 і 2023. Святочне удільованя нагород одбуде ся в септембрі 2024-го року. (ЛЕМ.ФМ, ПКФ)