Село Стебник ся находить в северозападній часті Низькых Бескидів, в долині рікы Стебнічек. Часть хотаря села патрить до Народной природной резервації Стебницька Маґура, котра была выголосена в 1964 року на охорону природных, місцямі аж пралісовых лісных порастів бука, єдлі і явора. Може і то была причіна орґанізуваня вчерайшой акції в селах Стебник і Зборов, цільом котрой было вычістіня току рікы Стебнічек. Хто на тоту думку прийшов говорить уж сам староста села Стебник Славомір Млинарь, „колеґа староста зо Зборова Янко Шуркала мене ословив на таку сполупрацу, жебы сьме вычістили ток рікы Стебничек способом такым, же Зборовчане підуть од Зборова, горі ріков а мы підеме зо Стебниика, долу ріков, так абы сьме ся стрітнули даґде в середині. Кедь ся нам  ток рікы подарить вычістити од смітя, так потім собі посидиме при даякім погостіню. Поможеме тым єднак нашій природі, котра ся не сама знечістила і єднак ся упевнять односины меджі ці уж самыма жытелями нашого села або жытелями обох сел – Стебника і Зборова.“ (Пкф)