Каштель Шередія із 16-го столітя в Зборові, Бардейовского окресу, перешов почас попереднього року і пів комплетнов реконштрукційов. Выновленый ренесанчный каштель в центрі села буде служыти як музей, а так само на културны події. Подля старосты села Яна Шуркалы обєкт рокы служыв Маковіцькому панству як резіденчный а пізніше адміністратівный центер.  „Пізніше ту были штатны лісы. Были ту і служобны квартелі про лісных робітників. У 1969-ім році обєкт выгорів і одвтогды властно упадав. Од 2014-го року, кедь сьме дістали каштель до маєтку, подарило ся нам го поступно реконштруовати. Реконштрукція завершыла ся в тім році, кедь сьме з европскых фондів в рамках черезгранічной співпраці Interreg V-A Польща-Словакія 2014 – 2020 здобыли і проінвестовали майже міліон евр,“ повів про аґентуру TASR Шуркала. Село на фінанцованю реконштрукції каштеля брало участь пятьома процентами. Вєдно з далшыма інвестіціями то подля старосты є проблизно 100 000 евр. Каштель реконштруовали поступно, у 2017-ім році была зроблена стріха. Сучасна реконштрукція была реалізована в рамках черегранічного проєкту Забыта країна Лемків і Руснаків у співраці із селом Кружльов і Ґмінов Устя Ґорлицьке. В каштелю теперь зарядять інтерьєр і плануть го отворити кінцьом року. Першу сезону про навщівників спустять правдоподобно в маю слідуючого року. (LEM.FM, Pkf)