Камюнка є русиньскым селом Старолюбовняньского окресу, котре мать свою нелем богату історію і прекрасну природу, але в сучасноти мать скоро вшытко што мать модерне місто ці село мати.   Хыбує їм уж лем інштитуція через котру бы ся старали о тых найстаршых жытелів села. З той причины в минулім року подали проєкт через котрый бы потрібну інштітуцію Денный стаціонар про сеніорів здобыли. Ближше уж о прoєкті говорить староста села Юрій Єдинак, „хочеме зреконштруовати стары невыужываны дітьскы яслі, котры были колись частьов матерьской школы. Є то проєкт в котрім бы ся мало проінвестувати коло 200.000 евр. В рамках планованого бютжету ся тыж рахує із закупліньом малого девятьмістьного авта, котре бы мало служыти на привезіня і одвезіня нашых найстаршых жытелів до нашого планованого заряджіня.“ (Кімак)