Любовняньске музеюм мать за собов з погляду чісла навщівників рекордный рік. На град і сканзен в Старій Любовні пришло минулый рік веце як 214 500 платячіх навщівників, што є дотеперь найвеце в історії. Діректор музея Далібор Мікулік про пресаґентуру TASR подтвердив, же ся їм подарило о пару стовок людей переконати, дотеперь так найсилнішым роком быв 2019-ый рік. Рік 2026 ся буде в Старій Любовні нести в знаку трьох важных подій. Любовняньске музеюм собі  припомяне 70-те выроча од свого взнику – в році 1956 го засновав Андрей Чепішак. Окрім того є то уж 20 років, што Ева Колларова і Петер Карпіньскый творять такзваны градны музікалы. „Третьов подійов є, же 26-го апріла сприступниме публіці послідню часть обновы граду – третій і четвертый двірь і воєньскы касарні. Буде там презентованый процес обновы і археолоґічны найджены предметы. Хочеме там вытворити інтерактівну выставу в рамках проґраму Interreg з Українов. Плануєме ю під назвов ‚Тихо перед голосом трубкы‘ сприступнити в році 2027,“ додав Мікулік. (TASR, Пкф)