Oцініня своїх професіоналных способностей і людьского приступу в одношіню до пацєнтів собі перед пару днями перевзяв Ян Кльоц, вызначный ортопед, довгорічный прімарь і сучасный предноста Клінікы oртопедії Факултного шпыталю з поліклініков Яна Адама Раймана в Пряшові. Над оцініньом вынесли вердікт самы пацєнты через вебсайт „lekar.sk“, де могли почас цілого рока оціньовати своїх дохторів. Троїцю тых найліпшых з цілой Словакії оцінили почас Tрeнд конференції Здравотный манажмент. Попри зубарьці і хірурґови з Братіславы собі оцініня перевзяв і узнаваный ортопед Ян Кльоц з Пряшова, родак з русиньского села Тихый Потік. Ян Кльоц здобыв оцініня TOП лікарь Словеньска в одборі ортопедії уж і в 2012-ім році. Під його веджіньом ся пряшівска ортопедія зачленила меджі найліпшы нелем на Словакії, aлe і за граніцями.
(Петро Кімак-Фейко)