Ґрекокатолицька  церьков на Словакії вчера, 3-го октобра 2021-го року, пережывала історічну дію. Першый раз святковав ся праздник з назвов Память чудотворной Клокочівской іконы Пресвятой Богородіці, Покровителькы Земпліна. Як інформував Пресовый центер Кошыцькой єпархії, в путніцькім місці Кошыцькой єпархії в Клокочові з той нагоды проходив одпуст. Як інформував далей центер, же ,,многы віруючі тым вєдно зо своїм єпархіалным єпіскопом владыком Кірілом Васильом пришли оддати честь копії Клокочівской іконі Пресвятой Богородіці, котра перед веце як 350-ма роками чудотворно слызыла.‟ На споминанім торжестві брав участь владыка Філіп Кочіш, гайдудороґскый архієпіскоп і метрополіта з Мадярська, крижевацькый єпарха владыка Мілан Стіпіч з Хорватії, як і емерітный кошыцькый єпарха владыка Мілан Хаутур. Праздник опередила наукова конференція на тему Клокочівска Богородіця, Покровітелька Земпліна, котра одбыла ся 1-го октобра в просторах Земпліньского музея в Михалівцях. (LEM.FM, ПКФ)