Вігорлатьскый музей в Гуменнім і тот рік приготовлює вєдно із Унійов жен Словакії вже 26-ый річник конкурзной выставкы писанок під назвов Карпатьска писанка 2018 (Karpatská kraslica 2018). Выставка буде проходити од 8-го марца до 6-го апріля 2018-го року. Як інформовала Яна Федічова із Вігорлатьского музею, дотеперь в Гуменнім выставльовало ся майже 21 тісяч писанок од 400 авторів і выставку навщівило майже 49 тісяч людей. Минулый рік в рамках Карпатьской писанкы выставльовало шістьдесять авторів писанок зо Словакії і веце як дві десяткы авторів із Україны, Польщі, Мадярьска і Чеськой републікы. Конкурзна выставка все презентує колекції традічных, но і новшых технік крашіня яєчок, котры ся всокотили, а і надалше розвивають в окремых областях Карпатьской котловины.
(Медвідь)