Польща дасть Пряшівському самосправному краю (ПСК) фінанчну поміч по октобровім землетрасіню на выходній Словакії. Малопольске воєводство, котре мать з Пряшівськым крайом довгодобу сполупрацю, венує краю як проявліня  солідаріты ненавратный фінанчный вклад в сумі міліон злотых, што представує коло 225.000 евр. Пресаґентуру TASR о тім інформувала говоркыня ПСК Даша Єленьова. Гроші край подля єй слов выужыє на оправу землетрасіньом пошкодженой доріжной інфраштруктуры і то конкретні драгы третього класу меджі селами Токаїк і Дяпалівці, котра ся находила прямо в огнищі землетрасіня і актуалні є в гаварійнім ставі. ПСК споминану суму мусить выужыти до 31-го децембра 2023-го року. (TASR, Pkf)