Проєкт затепліня будов Ґімназії Терезії Вансовой в Старій Любовні ся ближыть ку кінцю, роботы бы мали закінчіти в апрілю. Директорка школы Клавдія Саткеова про TASR потвердила, же іде о інвестіцію за веце як 600 тісяч евр із средств Пряшівского самосправного краю, котрый є зряджовательом школы. Затеплюють ся вшыткы будовы ґімназії, але і стріха, з цільом знижыти енерґетічны страты. Ґімназія має штири споєны обєкты, перша часть была звудована іщі в 1927-ім році. Школа рахує, же кельчікы на енерґії знижать ся по затепліню о 20 аж 30 процент. В ареалі недавно почали і роботы на будованю новой тілоцвічні.

(Медвідь, TASR)