Реґіоналны бібліотекы Пряшівского самосправного края завели діґіталну чітательску леґітімацію. До свого мобілу сі ю може стягнути каждый реґістрованый чітатель а може так хосновати службы бібліотекы комфортніше, скоріше, простіше і еколоґічніше. Нову службу понукать вшыткых вісем бібліотек края в Бардеёві, Гуменнім, Левочі, Пряшові, Попрадї, Старій Любовни, Свіднику і у Вранові над Топлёв. TASR о тім інформовала говоркыня края Даша Єленёва. Нова служба приносить подля єй слов дакілько бенефітів. Тым основным є, же чітатель сі ю знать стягнути до свого мобілного заряджіня а мати ю так хоцьколи ку діспозіції. Діґітална чітательска леґітімація му уможнює скорый і еколоґічный приступ ку чітательскому конту а зображує вшыткы інформації о выпожычках на єднім місцї. Як доповнила говоркыня края, зо здобытём діґіталной леґітімації поможуть чітателїм і заместнанцї єднотливых бібліотек, а то особнї, і-мейлом ці телефонічно. Поступ, як сі го можуть стягнути до мобілу, найдуть і на їх вебовых сторінках.

(TASR, Шутіова)