Здружіня інтеліґенції Русинів Словеньска по шестый раз передавало оцініня Русиньска особность року, котре є повязане із здобытьом скулптуры Медова баба. Оцінююча комісія в складі Александер Дулеба, Владимір Лихварь, Михал Штеньо і Ян Липиньскый  вырішыла тітулом русиньской особности за 2018-ый рік оцінити русиньского історіка, професора Івана Попа за його ціложывотный і тырвалый вклад до розвитку історійоґрафії Русинів. Святочно грамоту вєдно із скулптуров передавав председа здружіня Ян Липиньскый, котрый є єдночасно і председом Округлого стола Русинів Словеньска, на 1-ім Репрезентачнім балі Русинів, котрый проходив у суботу 16-гофебруара в Пряшові. Оціненый ся із здравотных причін оправдав за неучасть. Оцініня перевзяв сыновець Димитрій Поп молодшый, котрый прочітав дяковны слова оціненого. Липиньскый закінчів акт словами: „Пане професоре, дякуєме за світло, котре сьте внесли і вносите до забытой історії Русинів!“ Поп є автором або співатором многых книжок о русиньскій і чехословацькій історії, робив сценарі до трьох філмів Здружіня інтеліґенції Русинів Словеньска.

(Медвідь)