Пряшівскый самосправный край  (ПСК) як обїднаватель служеб в реґіоналнім автобусовім транспорті зазначів в посліднім періоді выняткове неочіковане пониженя споїв в рамках реґіону обслугованого транспортнов орґанізаційов Slovenská autobusová doprava (SAD) Poprad. Про порушіня ліценчных условій зачав прото проти орґанізації справне діяня. Інформувала о тім говоркыня Даша Єленьова. Як дале Єленьова конкретізувала, же неочіковане пониженя споїв реґіструють уж пару тыжднів, причім найгорша сітуація взникла 10-го януара, коли небыло аж 44 споїв діючіх. SAD Poprad о сітуації інформує на своїй інтернетовій сторинці і споминану сітуацію пояснює главні тым, жемного шоферів є хворых. Напрік тому, намагають ся дану сітуацію оператівно рішыти. Вірять, же обмеджіня потырвають лем до завтрашнього дня, 23-го януара. (TASR, Pkf)