До функції директоркы Словацького інштітуту в Празі наступила Яна Валёва. Нову членку тіму словацькой амбасады в уводї тыждня привитав словацькый амбасадор в ЧР Мартін Мураньскый. Валёва на соціалній сітї Фейсбук увела, же окрем директоркы споминаного інштітуту є ай першов таёмнічков Амбасады СР в ЧР, інформує о тім TASR. ,,Бывша довгорочна посланкыня Народной рады СР а колишня пріматорка міста Гуменне ся хоче в новій функції напрямити на посилнїня кооперації СР і ЧР посередництвом културы,“ увела словацька амбасада. Мураньскый зажелав Валёвій вшытко найлїпше в новій функції а выразив підпору при далшім проглубованю словацько-чеськых одношінь в области културы а уменя.

(TASR, Шутіова)