Турецькый презідент Речеп Тайїп Ердоґан в понедільок выголосив, же не допустить розпад Сірії. Покля бы до того мало дійти, є охотный нарядити воєньску інтервенцію. Турція є в довгодобім конфлікті з курдьскыма міліціями на севері країны, проти котрых уж веце раз зробила воєньскы операції. За словами Ердоґана не мож допустити акцептовати розділіня Сірії, і кедь збачать найменше різіко, Турція зробить потрібны крокы. Презідент повів, же Турція „має средства“, і може інтервеновати „почас єдной ночі“. По зосаджіню режіму презідента Башара Асада і перевзятю властей повстанецькыма ґрупами представлителі нового режіму інформовали, же Сірія буде в новім упорядкованю централізованов державов, і не рахують з федералным статусом про Курдів.

(Медвідь, TASR)