Росія ся надїять, же Італія поможе знормалізовати одношiня меджі Москвов і ЕУ, увів то у четверь російскый презідент Володимир Путїн по діскузіях з італійскым премєром Джузепем Контем в Римі. ,,Надїяме ся, же Італія буде говорити о тых одношінях дослїдно а яснo і буде ся снажыти о то, што было публічно повіджено, о обновліня нормалных одношiнь в повнім форматi меджі Росіёв і Европов в общім, “ повів Путїн на сполочній пресовій конференції з Контем. Цітовала го аґентура TASS. Російскый презідент выразив надїю, же нове веджіня Европской комісії наконець увидить шкоды, котры взникли в дослїдку протиросійскых санкції, і буде ся снажыти будовати добры одношіня з Росіёв.          

  ( Шутіова,TASR)