В тых днях навщівив Мукачовску ґрекокатолицьку єпархію Преосвященый владыка Курт Бурнетт, єпарха в Пассаіку, в Споєных штатах Америкы. Владыка пришов на Підкарпатя в часі, коли мала одбыти ся беатіфікація нового священомученика Петра Павла Ороса. Правліня Мукачовской єпархії в четверь 24-го апріля інформовало, же дата беатіфікації мусить перенести ся. Тото перенесіня є повязане із смертьов Папы римского Франціска. Як на сіті Facebook інформовав сайт Греко-Католицьке Закарпаття, 3-го мая, в день, коли мала быти беатіфікація, владыка Курт вєдно із Преосвященым владыком Теодором Мацапулом, мукачовскым єпархом, одслужыли літурґію в академічнім храмі при Ужгородьскій ґрекокатолицькій богословскій академії. В тот самый день єпіскопи ішли і до села Білкы, де ся вєдно помолили при мощах священомученика Петра Павла Ороса. По молитві владыкове рушыли до місця першого похованя священомученика в селі Камяньске і наконець навщівили Монастырь Пресвятой Родины в Джублику, котрый є выголошеный за місце молитвы Мукачовской єпархії. В неділю 4-го мая Преосвященый Теодор і Преосвященый Курт одслужыли літурґію в ужгородьскім Крестовоздвиженьскім катедралнім соборі. Джерело фотоґрафії: Facebook/ЛЕМ.ФМ.  (ЛЕМ.ФМ, Пкф)