В понедільок 20-го юла Ватікан оголосив, же Папа римскый Франціск призначів владыку Ніла Лущака, помічного єпіскопа Мукачівской ґрекокатолицькой єпархії, за апостольского адміністратора єпархії ad nutum Sanctae Sedis (до одкликаня Святішым престолом). О призначіню інформовав портал Vatican News. Владыка Ніл быв выменованый за адміністратора єпархії по смерти єпархіялного єпіскопа – владыку Мілана Шашіка, котрый наглі вмер з причіны тромбозы 14-го юла. Якраз в день його похорону Святішый престол вырішыв о дочаснім повіріню справованя єпархії. Ніл Юрій Лущак, ЧМВ, народив ся 22-го мая 1973-го року в Ужгороді. Теолоґічну і духовну формацію здобыв в Ужгороді і у 1996-ім році быв рукоположеный на священика. В роках 2004 – 2008 штудовав на Папскій Урбановій універзіті в Римі. У 2009-ім році вступив до новіціату Чіну меншых братів францісканів, де дістав монашеске мено Ніл і у 2012-ім склав вічны обіты. За помічного єпіскопа быв выменованый Папом римскым Венедіктом XVI. 19-го новембра 2012-го року. Рукоположеный на єпіскопа быв 12-го януара 2013-го року у Хрестовоздвиженьскім катедралнім соборі в Ужгороді.

(Медвідь)