Ґрекокатолицька харіта Пряшів (ҐКХ) зачала в новых просторах почас 2022-го року в Снині забезпечовати здравотну старостливость хворым в обыстях через Аґентуру домашньой здравотной старостливости (ADOS) і соціалны порады посередництвом Соціалного центра Снина. 8-го септембра 2022-го року ҐКХ офіціално в Снині одкрыла новы просторы Дому святого Пентелеймона, котры посвятив владыка Петро Руснак, апостольскый адміністратор Пряшівской архієпархії і братіславскый єпарха. Споминаны просторы были вдяка парохії Снина – Берегы і адміністраторови парохії отцьови Даніелови Шарішскому зреконштруованы в роках 2018 аж 2021. Інвестіцію до реконштруцкії просторів буде харіта сплачати почас 15-ох років, і в аренді їх має од новембра 2021-го року. Домашню здравотну старостливость забезпечують актуалні дві сестры ADOS у співпраці з амбулантныма лікарями, шпеціалістами, пацієнтом і його родинов. Денно сестры навщівлять довєдна 20 і веце пацієнтів у їх обыстях. Ку 1-му апрілю того року в Снині створили ся і одповідны условії про службу шпеціалных соціалных порад, кедь своє фунґованя почав Соціалный центер Снина. Центер помагать різным ґрупам жытелів – залежным на алкоголі ці наркотіках, людям без домова, сеніорам, здравотно зневыгодненым, людям і родинам в нужді, часточно і біженцям із Україны. (ЛЕМ.ФМ, Pkf)